INICIO

SAÚDA DO REITOR PARA A XXVI SEMANA DE CINE SUBMARINO DE VIGO

Despois dos actos de celebración do xxv aniversario da Universidade de Vigo e da Semana de Cine Submarino, presentamos unha nova edición na cal, a través da proxección de novos documentais, nos seguiremos achegando e aprendendo do mar e das criaturas que nel habitan, os seus segredos, a súa beleza e todo o seu esplendor.

A Universidade de Vigo mantén a súa aposta polo estudo e a preservación do mar. Podemos afirmar que non se entendería a nosa institución sen facultades tan senlleiras como as de Bioloxía e Ciencias do Mar, a Estación de Ciencias Mariñas de Toralla ou o noso Campus de Excelencia Internacional, o Campus do Mar.

Non se entendería tampouco un outono en Vigo sen as imaxes que ano tras ano agardan con ansiedade profesionais e público interesado; nin se podería entender Vigo e a súa comarca e Galicia en xeral sen o noso mar. O vínculo entre o mar, Vigo, a Universidade e a Semana de Cine Submarino é xa indisoluble.

Tiburóns, visitas a antigos barcos naufragados, o patrimonio natural da illa da Palma, o rei dos arenques que tanto alimentou a fábula da serpe xigante mariña, os novos sistemas de mergullo ou os chocos da enseada de San Simón, amosaránsenos en todo seu esplendor e gozaremos dos coloquios coas persoas convidadas ao certame que nos permitirán achegarnos aos segredos do mar con facilidade mais tamén co rigor preciso.

Quero destacar o labor da Vicerreitoría de Extensión Universitaria e Relacións Internacionais polo traballo e ilusión postos para coordinar e organizar este evento e darlle as grazas a Afundación pola súa colaboración por un dobre motivo: en primeiro lugar, porque non podemos ter mellor espazo que o seu teatro para deleitarnos coas imaxes e sons da Semana de Cine Submarino e, tamén, por facilitar que milleiros de escolares coñezan o noso mar e garantirnos así a súa futura conservación e protección.

Agardamos a presenza de todos e todas para gozar das sesións que vos temos preparadas este ano. Ábrese o pano de fondo…

 

salustiano-mato-reitor-da-universidade-de-vigoSalustiano Mato de la Iglesia
Reitor